КВН-ураты эйгэ. Манна барыта баар - киэҥ билии, бэргэн этии, чобуо куолас, көрүдьүөс
сүбэ, дорҕоонноох ырыа уонна булугас өй. КВН-нынан дьарыктанар сытыы-хотуу,
айар-тутар дьоҕурдаах, тэрийэр-салайар сатабыллаах буолар. Манна
хас биирдии оҕо бэйэтин тус санаатын, олоххо көрүүтүн,
дьээбэ-хообо түгэннэри, көр-күлүү оҥорон көрөөччү дьүүлүгэр таһаарар. КВН-ҥа оҕолор артыыс
буолалларын таһынан, өссө сценаристар, режиссердар, салайааччылар буолан
тахсаллар. 
Ол курдук сэтинньи 21 күнүгэр «Кэскил» интеллектуальнай-айар киин уонна «Саха-КВН» лигатын
көҕүлээһиннэринэн улуустааҕы «Саха-КВН» күрэҕэ үрдүк таһымнаахтык ыытылынна. Манна уопсайа 8
хамаанда кыттыыны ылла: «Таптал» Бүлүүтээҕи 3-с нүөмэрдээх оскуола хамаандата, «Уолаттар
уонна не уолаттар» Бүлүүтээҕи 1-с
нүөмэрдээх оскуола хамаандата, «Олоҥхо оҕолоро» Тылгыны орто оскуолатын
хамаандата, «Чаҕылҕан» Хаҕын орто оскуолатын хамаандата, «Ырбаҥсалар»
Бүлүүтээҕи 2-с нүөмэрдээх оскуола, «Чиккэс дьон» «Кэскил» ИАК хамаандата, «Мафия»
Чочу орто оскуолата, «Саха ньээшкэлэрэ» Халбаакы орто оскуолата. 
Күрэхтэһиини «Саха-КВН» ЛИГА активиһа, «Куйаар»
хамаанда чилиэнэ Владимир Герасимов иилээн-саҕалаан ыытта. Дьүүллүүр сүбэ
састаабыгар киирдилэр – Иван Николаевич Филиппов, МОО «Лига Саха-КВН» бэрэссэдээтэлин
э.т.; Алексей Еремеев уонна Айаал Винокуров - «Куйаар» хамаанда активистара, Слепцова
Мария Прокопьевна – Бүлүү улууһун үөрэҕириитин салалтатын специалиһа, Иван
Кириллин – эдэр ыччат уонна дьиэ кэргэн политикатын отделын специалиһа. 
Күрэхтэһии 4 түһүмэҕинэн ыытылынна – визитка, биатлон,
биир ырыа күрэҕэ, СТЭМ. Тыҥааһыннаах киирсии түмүгүнэн үһүс миэстэни Чочуттан «Мафия»,
иккиһи Тылгыныттан «Олоҥхо оҕолоро», маҥнайгы миэстэни Халбаакыттан «Саха
ньээшкэлэрэ» ыллылар. Ону таһынан араас номинациялар, анал ааттар
туттарылыннылар. Икки маҥнайгы миэстэни ылбыт хамаандалар улуус чиэһин
көмүскүү ахсынньы 3-4 күннэригэр Үөһээ Бүлүүгэ региональнай «Саха КВН» күрэҕэр
кыттыыны ылыахтара.
Мария КУЛАНОВА, «Кэскил» ИАК
тэрийээччи педагога.
|