Сунтаарга САХА-КВН
Олоҥхо дойдута - Сунтаар улууһугар, ахсынньы 6-7 күннэригэр ХV республикатааҕы «Саха КВН» оонньууларын Бүлүү бөлөх улуустарын региональнай таһыма (полуфинала) буолан ааста. Бүлүү улууһуттан икки хамаанда ситиһиилээхтик кыттан кэллэ :
- «Тап-тал» Советскай Союз Геройа Н.С. Степанов аатынан Бүлүүтээҕи 3 нүөмэрдээх оскуола хамаандата, салайааччылар: Сыромятникова А.П., Муксунова М.К.
- «Чиккэс дьоннор» «Кэскил» оҕо киинин сүүмэрдэммит хамаандата, салайааччылар: Филиппова Л. С, Потапов В.А.
Уопсайа күрэххэ 9 Бүлүү бөлөх хамаандалара: Сунтаар улууһуттан «Кыһыылаах кыраһаапчыктар», «Буойун сахалар», «Ниэрбэчкэлэр», Үөһээ-Бүлүүттэн «Уол да уол», «Ыччуу-ычча», Ньурбаттан «Саха аһыы пиэрэстэрэ», «Ыстапаан сиэннэрэ» кытыннылар.
Ол курдук, икки күннээх тэтимнээх киирсии түмүгүнэн «Көрдөөх көкөт» номинация кыайыылааҕынан Эдуард Филиппов, Бүлүүтээҕи гимназия 9а кылааһын үөрэнээччитэ, «Чиккэс дьоннор» хамаанда хамандыыра тахсан, «Тап-тал» хамаанда «Алтан чуораан» анал номинация кыайыылааҕа буолан, оҕолор олус үөрдүлэр-көттүлэр, көрөөччүлэр биһирэбиллэрин ыллылар.
Салайааччыларга инникитин да үлэҕит ситиһиилэрдээх үтүө түмүктэрдээх буолуон баҕарабыт!
|