Саха Өрөспүүбүлүкэтин ыччат политикатын уонна дьиэ кэргэн миниистирин бастакы солбуйааччыта Г.И. Семенов: «Дойду сайдарыгар билиҥҥи ыччат суолтата сүрдээх улахан. «Саха КВН» ыччаты биир санааҕа, интэриэскэ түмэр саха тылын туттуллар эйгэтин кэҥэтэр, эдэр дьону сырдыкка-үтүөҕэ угуйар дьикти алыптаах.», - диэн этиитинэн салайтаран, Бүлүү улууһугар үөрэхтээһин 185 сыллаах үбүлүөйүгэр анаан, оскуола оҕолоругар «САХА КВН» оонньуута бу дьыл алтынньы 18 күнүгэр «Кэскил» оҕо киинигэр ыытылынна.
Оонньууга 5 күүстээх хамаанда күөн көрүстүлэр:
1. «Тап-тал» - Советскай Союз Геройа Н. С. Степанов аатынан Бүлүүтээҕи 3 нүөмэрдээх орто оскуола хамаандата, хамандыыр Вася Николаев, салайааччылар: Сыромятникова Анна Прокопьевна, Муксунова Мария Касьяновна;
2. «Чиккэс дьоннор» «Кэскил» оҕо киинин сүүмэрдэммит хамаандата, хамандыыр Эдик Филиппов, салайааччы: Иванов Иван Сергеевич;
3. «Айар дьон» Өкүндү оскуолатын хамаандата, хамандыыр Дима Никифоров, салайааччы: Семенова Татьяна Васильевна;
4. «Хабырыыл сиэннэрэ» Г.И. Чиряев аатынан Бүлүүтээҕи 1 нүөмэрдээх орто оскуола хамаандата, хамандыыр Борис Васильев, салайааччы: Петров Василий Васильевич;
5. «Красавчики» Чочу орто оскуолатын хамаандата, хамандыыр Иван Егоров, салайааччы: Томский Семен Семенович.
Оонньуу 4 араас түһүмэхтэринэн сыаналанна: бэйэни билиһиннэрии, ыйытынньык, уран тыл маастара, стем. Хамаандалар оонньуу устата олус көхтөөхтөрүн, түмсүүлээхтэрин көрдөрдүлэр. Маны тэҥэ, музыкальнай киэргэтии табатык туттулунна. Күрэҕи кыттааччылар бэйэлэрин толорууларыгар ырыалара тупсаҕайдык киэргэттэ. Манна ордук «Тап-тал» хамаанда чаҕылхайдык көһүннэ. Сыанаҕа тутта-хапта сылдьыыга «Чиккэс дьоннор» көрүдьүөстэрэ көрөөччүлэри олус сэргэхситтэ. Инникитин күрэх ыытылларыгар тыл-өс культуратын көтөҕөргө, редактирование үрдүк таһымҥа барара ирдэниллэр.
Күрэх түмүгүнэн кыайыылаах үрдүк аатын «Кэскил» оҕо киинин сүүмэрдэммит хамаандата «Чиккэс дьоннор» ыллылар. Иккис бочуоттаах миэстэни Советскай Союз Геройа Н. С. Степанов аатынан Бүлүүтээҕи 3 нүөмэрдээх орто оскуола «Тап-тал»хамаандата ылла. Үһүс миэстэни Чочу орто оскуолатын «Красавчики» хамаандата ылла. «Сатабыллаах саарын» анал номинация кыайыылааҕынан Николаев Петя, Өкүндү оскуолатын хамаандатын кыттыылааҕа таҕыста. Икки бастыҥ хамаанда ахсынньы ыйга Сунтаар улууһугар ыытыллар региональнай «Саха КВН» оонньууга кыттар чиэскэ тигистэ.
Күрэх тэрээһинин «Бүлүү куората» муниципальнай тэриллии, Бүлүү улууһун үөрэҕириитин салалтата, Бүлүү улууһун ыччат политикатын отдела, «Кэскил» оҕо киинэ, «Бүлүү кэскилэ» улуус оҕолорун общественнай холбоһуктарын түмсүүтэ көҕүлээтилэр. Күрэх тэрийээччилэригэр уонна саҥа көрүүнү олоххо киллэриигэ иккис сылын бэйэлэрин күүстэрин-уохтарын, сүбэлэрин-амаларын биэрэр төһүү күүс буолар дьоммутугар «САХА КВН» Бүлүүтээҕи «Ыллыыр кумах» устудьуоннар хамаандаларын ыччаттарыгар Ньургун Хоноеховка (Куккун) уонна Ваня Кириллиҥҥэ (Дьамаат) улахан махталбытын тиэрдэбит. Хас биирдии КВН оонньууну сэҥээрэр кыттааччыларга, сонун миниатюралары, саҥа саҕахтары арыйаргытыгар баҕарабыт.
Филиппова Лидия Семеновна,
«Бүлүү кэскилэ» улуус оҕолорун общественнай
холбоһуктарын түмсүүтүн салайааччыта.
| 
0